Brand Lle Hwlffordd
Cleient: Cyngor Sir Benfro
Partneriaid: Rooted in Place: Sensible, Lee John Phillips
Lle: Hwlffordd, Sir Benfro
Angen y gymuned
Ym mis Mawrth 2022, ceisiodd Cyngor Sir Penfro ddatblygu brand lle ar gyfer tref Hwlffordd. Mae'r dref wedi derbyn buddsoddiad sylweddol yn ddiweddar a fydd yn galluogi datblygu asedau allweddol er budd y gymuned leol a denu ymwelwyr.
Nod y prosiect oedd creu hunaniaeth dref, 'brand ymbarél' ac ymgyrch brand i hyrwyddo Hwlffordd. Rhan gynhenid o'r brand oedd golwg a theimlad llecynnau cyhoeddus a sut mae pobl yn eu defnyddio ac yn symud trwyddynt, yn enwedig wrth i'r datblygiadau newydd fynd rhagddynt.
Yr hyn a wnes i
Gweithiais gyda Giles Davis a Lee John Phillips, trwy ein hasiantaeth brandio arbenigol Rooted in Place. Gyda'n gilydd, buom yn llunio strategaeth gyfathrebu, dylunio a brandio.
Trwy gyfres o sesiynau briffio, teithiau cerdded yn y dref ac ymchwil desg, daethom i ddeall y strategaeth fuddsoddi, canfyddiadau o'r dref, sut y caiff ei hyrwyddo ar hyn o bryd a'r angen i gyd-fynd â dull ehangach Croeso Sir Benfro.
Yna, buom yn trefnu nifer o ymgynghoriadau cymunedol, a oedd yn cynnwys arolwg ar-lein a hyrwyddir gan y cyfryngau cymdeithasol, cymhorthfa galw heibio am ddeuddydd yng nghanol y dref a rhai gweithdai wedi'u targedu.
Fe wnaethon ni gynnal y gymhorthfa galw heibio mewn siop wag. Buom yn gosod ffotograffau a brasluniau o olygfeydd o’r dref ar linellau golchi a gwahodd pobl i ddweud wrthym beth maen nhw'n ei hoffi am Hwlffordd a lle mae'r dref yn ddiffygiol. Daeth dros 300 o bobl, gan gynnwys disgyblion ysgol uwchradd a grŵp hanes lleol.
Roedd y cyfuniad o ymatebion i'r arolwg a sylwadau wyneb yn wyneb yn ein helpu i ddeall atyniadau unigryw y dref a chreu brîff ar gyfer y cam dylunio. O'n gwaith ymchwil, fe wnaethon ni ddysgu mai'r pethau "gorau" am Hwlffordd yw (mewn trefn):
Yr afon
Lleoliad Canol Sir Benfro
Y castell
Pobl gyfeillgar
Siopau annibynnol
Hanes a threftadaeth.
Yna fe wnaethon ni eu gwau yn hunaniaeth hawdd ei hadnabod sy'n cyfleu "Calon Sir Benfro". Cynaliasom weithdai gyda'r cyngor sir cyn ymgynghori'n ehangach ar y cynllun gyda'r cyngor tref a'r cylch busnes lleol.
Y canlyniad
Mae'r brif hunaniaeth yn cyfuno’r castell, yr afon a safle canolog Hwlffordd yn Sir Benfro gyda theip mercantile sy'n cynrychioli gorffennol masnachu'r dref.
Mae'r palet lliw yn cyfeirio at amgylchedd naturiol ac adeiledig Hwlffordd, a ysbrydolir gan yr afon, adeiladau eiconig a theils y dref a ddarganfuwyd o gloddiadau yn y ffrierdy.
Ym mis Gorffennaf 2023, fe wnaethon ni’r canlynol:
Lansio'r brand lle gyda phartneriaid lleol
Creu pecyn adnoddau ar-lein ar gyfer defnydd ehangach
Cynhyrchu rhai eitemau hyrwyddo, gan gynnwys bagiau siopa, mygiau, beiros, sticeri a bathodynnau pin, ar gyfer busnesau lleol a sefydliadau eraill.
Mae'r brand bellach yn cael ei ddefnyddio ar arwyddion safle o amgylch prosiectau adfywio ac mae hefyd yn cael ei ystyried yn strategaeth ddynodi llwybrau a ffyrdd y dref yn y dyfodol.
